Vetter Matz verkörpert den etwas altmodischen, aber pfiffigen, selbstbewussten donauschwäbischen Bauern, der aus Hoppsenitz, einem kleinen Banater Dorf, kommt.

Sammlung verschiedener Geschichten "vum Vetter Matz"

Facla Verlag Timisoara/Temeswar, 1979




zurück zur Übersicht Vetter Matz

Die Uhr geht richtich

Liewe Leit, wann jungi Leit heirate un die Honichwuche rum sin, no kumme se jo stad druf, was er for Naupe un sie for Flause hat.
Mir is des annerscht gang. Mei Naupe ware, owets Kartespiele gehen, un mei Kathi – na, ihr werd jo gsiehn.
Eemol, wie ich um nein Uhr owets vum Kartespile hemkumm, macht mei Weib e Eselsspektakel un schreit: "Schämscht dich net, weescht dann du net, wann mer hemgeht, s is elef Uhr!"
Tatsach, die Uhr is gang un hat elef gewies.
Sa ich: "Ich wees net, de Sepp wohnt zwaa Heiser weider, ich wor doch net zwaa Stunn ufm Hemwech!"
Sie: "Wer weeß, wu du dich noch rumgetrieb hascht..." unsoweider. Wie des noch zwoo-dreimol vorkumm is, is mir de Knopp endlich uffgang...
Eemol saat mei Weib: "Morje frieh geh ich uf Detta, uf de Wuchemark, un dass ich net verschloofe tu, werscht du wackrich bleiwe. Kannscht die Nacht mitm Kartespile vrputze. Kannscht a emol for mich ufbleiwe. Huck dich in die Kich, spill Karte mit dr selwer, hol die Zeidung – mach, was d willscht awr um vier Uhr will ich geweckt were!"
Ich machs korz: Bis zwellef han ichs gepackt, no hat mich de Schlof iwermannt. Ich han mich korz iwerleet, sin ins Zimmer un han gsaat: "Kathi, es is Zeit."
Mei Weib is hortich uf, hat ihre Korb ghol, hat sich uf de Wech gemach – un ich han mich ins warmi Bett gekuschelt!
Gegr Mittach is mei Kathi hemkumm. Wie ichs die Gaß han ruffkumme gsiehn, han ich schun gewißt, daß de Blitz enschlaan wird – un han mich hiner de Owe gedrickt.
Mei Kathi hat schun am Gassetierl gschrie: "Wu isr, der Niemand, der Allerletschti, daß ich ne an die Mauer plätsch, daß sei Mottr ne mitm Schmorreschippche loskratze muß!"
Die Wes Gredl, die Nochberin, is glei geloff kumm un hat gfroot: "Was is denn Schreckliches passiert?"
Saat mei Kathi: "Wie ich in Detta ankumm, wars noch immer sackdunkl. Ke Mensch un ke Seel uf dr Gaß. De Nachtwächter hat mich gfroot, was ich dann schun will. Na, han ich gsaat, uf de Wuchemark will ich. Er schaut mich groß an unfroot, wann ich vun drhem fort sin. Na, um vier Uhr. Do lacht er un ment, des ism noch net passiert, daß eener um vier Uhr morjets vun Hopsenitz fort is un um zwaa Uhr schun in Detta wor. – Alsdann hat mei Matz, der Limml, doch an dr Uhr rumgfingert!"
Die Weß Gredl hat gelacht un hat gsaat: "Schau mol, Kathi, die Matz is jo ke Trottl un aa net uf de Kopp gfall, der hat doch aa schun bemerkt, daß du die Uhr vorrickscht, wannr owets Kartespile geht!" Wie de Blitz sin ich hinerm Owe raus un han geruf: " Weib, jetz sin mr quitt!"

Un seit dere Zeit geht die Uhr richtich.